Xabaringiz bor, O‘zbekiston so‘nggi yillarda Osiyo miqyosidagi bir nechta nufuzli turnirlarga mezbonlik qilib kelmoqda. Xususan, keyingi yili 23 yoshgacha bo‘lgan futbolchilar o‘rtasidagi Osiyo kubogi ham yurtimiz maydonlarida bo‘lib o‘tadi. Mazkur musobaqaga tayyorgarlik esa hozirdanoq boshlab yuborilgan.
Bugun O‘FA birinchi vise-prezidenti Ravshan Ermatov boshchiligida musobaqa tashkiliy qo‘mitasining yig‘ilishi o‘tkazildi.
Yig‘ilishda yaqin vaqt ichida turnir o‘tkaziladigan stadionlar, mehmonxonalar va mashg‘ulot maydonlarining tayyorgarligini ko‘zdan kechirish hamda ularni OFK talablariga mos holatga keltirish vazifasi belgilandi. Shuningdek, barcha yo‘nalish bo‘yicha mas’ullarga tegishli topshiriqlar berildi.
