Tojikiston poytaxti Dushanbe shahrida Markaziy Osiyo futbol konfederasiyasining 6-Kongressi o‘tkazildi. Unda O‘FA birinchi vise-prezidenti Ravshan Ermatov boshchiligida o‘zbekistonlik mutaxassislar ham ishtirok etishdi. Kongressni CAFA prezidenti Rustam Emomali ochib berdi va assosiasiya a’zolariga mintaqada futbolni rivojlantirish yo‘lida amalga oshirilayotgan ishlar uchun minnatdorchilik bildirdi.
2021 yil murakkab kechganiga qaramay, tashkilot tomonidan rejadagi turnirlar va tadbirlar yaxshi saviyada o‘tkazilgani e’tirof etildi. Kongressda asosiy e’tibor 2022 yil rejalariga qaratildi. Taqvimga ko‘ra yil davomida CAFA shiori ostida 8 ta musobaqa o‘tkazilishi ijroiya qo‘mita tomonidan ma’qullandi.
Shuningdek, a’zo assosiasiyalarning takliflari o‘rganib chiqildi. O‘FA delegasiyasi tomonidan 2025 yilgi yoshlar o‘rtasidagi Jahon chempionatini Markaziy Osiyo mamlakatlarida qabul qilish bo‘yicha tashabbus ilgari surildi. CAFA mintaqasi mamlakatlarida birlashgan Mundial o‘tkazish taklifi barcha ishtirokchilar tomonidan iliq kutib olindi. Ushbu tashabbus asosida loyiha ishlab chiqilishi ma’qullandi.
