Kristian Eriksen kecha «Inter» bilan shartnomani bekor qildi. Ammo, yozda Daniya terma jamoasining Yevro-2020 musobaqasi doirasidagi Finlyandiyaga qarshi bahsda yuragi bilan bog‘liq muammoga uchragan futbolchi butsasini mixga ilib qo‘ymoqchi emas. Yarimhimoyachining agenti allaqachon Eriksen professional darajada o‘ynashda davom etishini ma’lum qilgan.
“Tipsbladet” nashrining yozishicha, Kristian Eriksen vatani Daniyadan ikkita taklif olgan. Yarimhimoyachiga «Odense» va «Kopengagen» klublari shartnoma taklif qilgan. Biroq 29 yoshli futbolchi bu takliflarni rad etdi.
Qayd etilishicha, Kristian Eriksen Gollandiya yoki Angliyada faoliyatini davom ettirishi mumkin. Biroq, daniyalikning qachon maydonga qaytishi haqida hozircha aytish qiyin.
