Polshaning Varshava shahrida shaxmatning rapid yo‘nalishida so‘nggi tur bahslari o‘tkazildi. Nodirbek Abdusattorov 13-turda polshalik Yan-Kristof Dudaga qarshi oq donalarda o‘ynadi.

Hamyurtimiz uchun o‘yinning debyut qismi unchalik muvaffaqiyatli bo‘lmadi. Shu bois, qiyin vaziyatdan chiqib ketishga harakat qildi va buni uddaladi. O‘yin so‘ngida har ikki sportchining bittadan piyodasi farzinga chiqishga bir qadam qoldi. Ammo shaxmatchilar bir-birlarining figuralarini yeb tugatishdi. Natijada doskada faqat shoxlar qoldi — durang.

So‘nggi tur oldidan 9 ochko jamg‘arib turgan Nepomnyashchiy, Karlsen va Karuana ham o‘z partiyalarini durang bilan yakunlashdi. Natijada 4 shaxmatchi yakunda 9,5 balldan jamg‘arishdi.

Ayni paytda tashkilotchilar musobaqa reglamentidan kelib chiqib g‘olib nomini aniqlash bilan band. Koeffisiyentlar tizimi bo‘yicha ustunlik Nodirbek tomonda. Tay-brek o‘yinlari o‘tkazilishi ham mumkin. Yakuniy xulosani kutamiz.