“L’Equipe” nashri “Borussiya” hujumchisi Erling Xoland yangi jamoasiga qanchaga tushishi mumkinligini hisoblab chiqdi. Fransuzlarning hisob-kitoblariga qaraganda, xaridor klub forvard uchun taxminan 300 million yevro to‘lashi kerak bo‘ladi.

Bu summa norvegiyalikning tovon puli (75 million yevro), agent Mino Rayola va Erlingning otasiga to‘lanadigan komissiya (20 million yevro), shuningdek, hujumchining keyingi 6 yildagi maoshidan iborat. Jurnalistlarning fikricha, Xolandning yillik maoshi 30-35 million yevroni tashkil qiladi.

Qayd etilishicha, “Borussiya” rahbarlari Xoland atrofidagilarga ultimatum qo‘ygan: Erling kelajagi haqida shu yilning fevraligacha qaror qilishi kerak. Agar futbolchi Dortmundda qolishga qaror qilsa, “Borussiya” uni jamoaning eng ko‘p maosh oluvchi futbolchisiga aylantirishga tayyor, uning yangi shartnomasi yillik maoshi soliqlar to‘lanmagan holda 16 million yevroni tashkil qilishi mumkin. Hozirda Dortmundda eng ko‘p maoshni klub afsonasi Mark Roysni oladi - 12 million yevro.