“L’Equipe” нашри “Боруссия” ҳужумчиси Эрлинг Холанд янги жамоасига қанчага тушиши мумкинлигини ҳисоблаб чиқди. Французларнинг ҳисоб-китобларига қараганда, харидор клуб форвард учун тахминан 300 миллион евро тўлаши керак бўлади.

Бу сумма норвегияликнинг товон пули (75 миллион евро), агент Мино Райола ва Эрлингнинг отасига тўланадиган комиссия (20 миллион евро), шунингдек, ҳужумчининг кейинги 6 йилдаги маошидан иборат. Журналистларнинг фикрича, Холанднинг йиллик маоши 30-35 миллион еврони ташкил қилади.

Қайд этилишича, “Боруссия” раҳбарлари Холанд атрофидагиларга ультиматум қўйган: Эрлинг келажаги ҳақида шу йилнинг февралигача қарор қилиши керак. Агар футболчи Дортмундда қолишга қарор қилса, “Боруссия” уни жамоанинг энг кўп маош олувчи футболчисига айлантиришга тайёр, унинг янги шартномаси йиллик маоши солиқлар тўланмаган ҳолда 16 миллион еврони ташкил қилиши мумкин. Ҳозирда Дортмундда энг кўп маошни клуб афсонаси Марк Ройсни олади - 12 миллион евро.