Xalqaro shaxmat federasiyasining har oy yakunida e’lon qilinadigan reytingida klassik shaxmat yo‘nalishida ayni damda TOR-100dan birgina shaxmatchimiz o‘rin olgan. Hisob bo‘yicha 17-jahon chempioni, xalqaro grossmeyster Rustam Qosimjonov 2 659 ball bilan 82-o‘rindan joy olgan. U 1979 yilda Toshkent shahrida tug‘ilgan va 2004 yilgi Liviyada o‘tkazilgan jahon chempionati g‘olibi sanaladi.

Yosh, umidli shaxmatchilarimiz bo‘lmish Nodirbek Abdusattorov, Javohir Sindarov, Nodir Yoqubboyev va Shamsiddin Vohidovlar hali TOR-100ga kirishmagan bo‘lsada, ular o‘smirlar toifasida dunyo reytingida peshqadamlar safidan joy olib turishibdi. Jumladan, rapid yo‘nalishida jahon chempionligini qo‘lga kiritgan N.Abdusattorov va J.Sindorov kuchli o‘ntalikda qayd etilgani har bir yurtdoshimizga faxr va iftixor bag‘ishlaydi.

Ma’lumki, FIDE o‘smirlar shaxmatchining reyting o‘rinlarini alohida hisoblab boradi. 20 yoshgacha bo‘lgan eng kuchli 100 nafar yosh shaxmatchi ro‘yxatidan biryo‘la 4 nafar hamyurtimiz o‘rin olgan:

7. GM Nodirbek Abdusattorov (2004) – 2641 ball,

9. GM Nodirbek Yoqubboyev (2002) – 2630,

14. GM Javohir Sindorov (2005) – 2609,

24. GM Shamsiddin Vohidov (2002) – 2536.

Ayni paytda O‘zbekistonning eng kuchli 10 nafar shaxmatchisi quyidagicha ko‘rinish olgan:

1. GM Rustam Qosimjonov (1979 yilda tug‘ilgan) – 2659,

2. GM Nodirbek Abdusattorov (2004) – 2641,

3. GM Nodirbek Yoqubboyev (2002) – 2630,

4. GM Javohir Sindorov (2005) – 2609,

5. GM Jahongir Vohidov (1995) – 2552,

6. GM Shamsiddin Vohidov (2002) – 2536.

7. GM Andrey Kvon (1989) – 2527.

8. GM Jo‘rabek Hamroqulov (1988) – 2507.

9. GM Mixail Saltayev (1962) – 2482.

10. Bobur Sattorov (1995) – 2465.