Namangan futbolsevarlar viloyati ekanligi barchaga ma’lum. Buni muhtaram Prezidentimiz Shavkat Miromonovich Mirziyoyev viloyatimizga tashriflari chog‘ida ham e’tirof etib, “Namangan o‘zbek futboliga Odil Ahmedov singari iste’dodli, vatanparvar futbolchini yetkazib berganligi bilan faxrlanishi, “Navbahor” muxlislari Angliya, Italiya va Fransiya futbol fanatlaridan qolishmasligi, viloyatimiz shahar va qishloqlarida Odil Ahmedovning izdoshlari yana ko‘plab topilishi, “Navbahor” futbol klubi bazasida “Futbol akademiyasi”ni tashkil etib, Davlatobod tumanini sport shaharchasiga aylantirish” borasida fikr bildirgandilar.
Muhtaram Yurtboshimiz bejizga viloyatimiz futbolini e’tirof etmadilar. Boisi, Namangan viloyati hokimi, viloyat futbol assosiasiyasi prezidenti Shavkat Shokirjanovich Abdurazzoqov ham viloyatimizda millionlar o‘yiniga ulkan e’tibor qaratmoqda. Viloyatimiz rahbari nafaqat yurtimiz, balki sobiq ittifoq va Osiyoda o‘z ham o‘rniga ega, milliy chempionatimizning eng sovrindor jamoalaridan biri bo‘lgan “Navbahor”ning oldingi shonli tarixini tiklash maqsadida.
Shu bois, jamoamiz tarkibi tajribali va mahoratli futbolchilar hisobiga kuchaytirilib, “Navbahor”ning oldiga yangi mavsumda Osiyo Chempionlar Ligasi (OCHL) yo‘llanmasini qo‘lga kiritish vazifasi qo‘yildi hamda jamoamiz a’zolari ayni paytda Turkiyaning Antaliya shahrida o‘quv-mashg‘ulot yig‘inini olib borishmoqda.
Albatta, Shavkat Shokirjanovichning futbolga ulkan e’tibor qaratayotgani “Navbahor” muxlislarini xursand qilmoqda.
Bugun “Navbahor” PFK qarorgohiga jamoamizning fidoyi va jonkuyar muxlisi Rustam Muhammedov “Navbahor” PFK fan-klubi yetakchilari – Hamidullo Mukarramov hamda Muzaffar Gaffarov hamrohligida tashrif buyurib, viloyatimiz rahbarining millionlar o‘yiniga bo‘lgan e’tiborlarini e’tirof etgan holda, Shavkat Abdurazzoqovga minnatdorchilik va tashakkur sifatida jamoamiz muxlislari nomidan o‘zbek milliy libosi – to‘n sovg‘a qildi.
Viloyatimiz rahbari ayni paytda mehnat ta’tilida bo‘lganligi bois, Rustam Muhammedovdan hokimning sovg‘asini “Navbahor” PFK prezidenti Otabek Arifovich Samatov qabul qilib oldi hamda muxlisga tashakkur bildirgan holda, mazkur to‘nni mehnat ta’tilidan qaytganidan so‘ng, viloyatimiz rahbariga yetkazishini bildirdi.
“Navbahor” PFK matbuot xizmati.
