Londonning "Chelsi" klubi sobiq futbolchisi Floran Maludaning fikricha, "ko‘klar" yangi xaridlarni amalga oshirmasligi kerak.

Avvalroq, "Chelsi" ustozi Tomas Tuxel jarohatlar sababli, tarkibga yangi futbolchilarni qo‘shib olish kerakligi haqida gapirgandi.

"O‘ylaymanki, transfer bozorida "Chelsi" ehtiyoj sezayotgan futbolchilar ko‘p emas. Yuqori saviyadagi futbolchilarning barchasi band, "Chelsi" esa faqat sovrinlar uchun kurashishda yordam beradigan va tarkibdagi o‘rin uchun raqobatni oshiradigan futbolchilarga e’tibor qaratishi kerak.

"Chelsi" tarkibidagi sog‘lom futbolchilar haqida gapiradigan bo‘lsak, menimcha, o‘sha futbolchilar bilan ham o‘z oldiga qo‘yilgan maqsad sari borish mumkin, chunki, tarkibda sifatli futbolchilar ko‘p.

Ular Lukakudek futbolchini o‘z safiga qo‘shib olishdi. Bundan tashqari, hozir bir qator futbolchilar Afrika Kubogi musobaqasida ishtirok etmoqda. Ular safga qaytsa yana tarkibda sog‘lom raqobat yuzaga keladi", — dedi Maluda William Hill bilan suhbatda.