Italiya terma jamoasi bosh murabbiyi Roberto Manchini «Manchester Yunayted»ni boshqarishi mumkin. Bu haqda insayder Fabrisio Romano aytib o‘tdi.

«Ko‘ramiz, Roberto Manchini bilan vaziyat qanday rivojlanadi. U Italiya terma jamoasi bilan band, ammo mart oyida JCH-2022 pley-off o‘yinlaridan keyin nima bo‘lishini ko‘ramiz. U asosiy nomzodlardan biri bo‘lishi mumkin. U bir kun kelib Premyer-ligaga qaytishni xohlashini aytgandi. Men uning ismini asosiy da’vogarlar ro‘yxatiga kiritgan bo‘lardim», dedi Romano Rio Ferdinandning FIVE ko‘rsatuvida.

Manchini Italiya terma jamoasini 2018 yildan buyon boshqarib kelmoqda. 2009—2013 yillarda u «Manchester Siti» bosh murabbiyi bo‘lgan va u bilan birga Premyer-liga chempionligi, hamda Angliya kubogini qo‘lga kiritgan.

2022 yilning mart oyida Italiya terma jamoasi JCH-2022da o‘ynash uchun saralashning pley-off bosqichida ishtirok etadi.