Portugaliyaning «Portu» klubi futbolchisi Luis Dias o‘z yurtida - Kolumbiyada tibbiy ko‘rikdan o‘tdi va «Liverpul» bilan shartnoma imzolashga tayyorlanmoqda.

Dias joriy mavsumni ajoyib o‘tkazmoqda, o‘z "Portu" tarkibida 28 o‘yinda maydonga tushib, 16 gol urdi va 6 golga assistentlik qildi. O‘tgan yili bo‘lib o‘tgan Amerika Kubogining eng yaxshi to‘purari bo‘lgandi.

Biroq, «Portu» Chempionlar ligasi guruh bosqichida «Liverpul» va «Atletiko» klublaridan keyin uchinchi o‘rinni egalladi va shuning uchun asosiy futbolchisini sotish haqida o‘ylashga majbur bo‘ldi.

"Portu" shu yilning yozida Diasni 67 million funt sterlingga sotishni mo‘ljallab turgandi.  Chunki, futbolchining shartnomasida tovon puli 67 million funt sterling qilib belgilangandi. Biroq, «Liverpul» Portugaliya klubiga 37 million + 12 million funt bonus taklif qildi.

Yuqorida aytib o‘tilganidek, Dias kecha tibbiy ko‘rikdan muvaffaqiyatli o‘tdi va "Liverpul" dushanba kuni ushbu transferni rasman e’lon qiladi.

Qo‘shimcha o‘rnida shuni aytish mumkinki, kelasi haftada seshanbadan chorshanbaga o‘tar kechasi Dias o‘z terma jamoasi tarkibida Argentinaga qarshi o‘ynaydi, shuning uchun kolumbiyalik futbolchi keyingi hafta oxirida Yurgen Klopp jamoasiga qo‘shiladi.