"Barselona" bugun rasman gabonlik 32 yoshli hujumchi Pyer-Emerik Obameyang bilan shartnoma imzolaganini e’lon qildi.
Forvard bilan tuzilgan shartnoma 2025 yilga qadar mo‘ljallangan bo‘lib, 2023 yilning yozida o‘zaro kelishuv asosida bekor qilinishi mumkin.
Jurnalist Toni Xuanmartining fikricha, Obameyangning 2023 yildan keyin ham "Barsa"da qolishi dargumon, chunki klub unga kelasi mavsumlarda olishi kerak bo‘lgan ma’lum miqdorni to‘lab, shartnomasini bekor qilishi mumkin.
Manbaga ko‘ra, bu formula bilan gabonlikning maoshi ko‘proq "taqsimlangan" va Kataloniya klubining gaznasiga kamroq ta’sir qiladi.
Avvalroq, "Arsenal" 31 yanvar kuni shartnomani bekor qilish uchun Obameyangga 8 million yevro to‘lagani xabar qilingandi.
