“Qo‘qon-1912” jamoasi bugundan mavsumga tayyorgarlikning navbatdagi bosqichini boshladi.

Bu safargi yig‘in avvaldan reja qilinganidek Toshkent shahrida bo‘lib o‘tadi. Baxtiyor Ashurmatov shogirdlari bugun Toshkent shahrida to‘planishdi hamda dastlabki mashg‘ulotlarini o‘tkazishdi. “To‘qimachi” stadionida bo‘lib o‘tgan bugungi mashg‘ulotlardan jamoa muxlislarini xursand qiladigan xushxabar bor.

“Qo‘qon-1912” jamoasining bugungi mashg‘ulotlariga Qo‘qonlik futbol muxlislarining sevimli futbolchisi, jamoadagi ajoyib o‘yinlari bilan mashhur bo‘lgan, ikki karra Osiyo chempioni Javohir Sidiqov qo‘shildi.

Jamoa murabbiylari Toshkentdagi yig‘inda asosan taktik mashg‘ulotlarga, jamoaviy o‘yinni tashkil qilishga ko‘proq urg‘u beradilar. Mazkur o‘quv-yig‘ini davomida uchta nazorat o‘yinini tashkil qilish reja qilingan.

Nazorat o‘yinlarining vaqti hamda sparring-raqiblar haqida keyingi xabarlarimizda ma’lumot beramiz.