Oʻzbekiston futbol assotsiatsiyasining majlislar zalida ayollar qoʻmitasining navbatdagi yigʻilishi boʻlib oʻtdi. Unda OʻFA rahbariyati, ayollar futboli murabbiylari va qoʻmita aʼzolari ishtirok etdi.

Yigʻilish avvalida mamlakatimizda keyingi yillarda ayollar sporti, xususan, futbolga berilayotgan eʼtibor eʼtirof etildi. OʻFA tomonidan ham ayollar futbolini rivojlantirish, ushbu yoʻnalishdagi mavjud sharoit va kamchiliklarni oʻrganib borish hamda uni bartaraf etish maqsadida ayollar qoʻmitasi tashkil etilganligi qayd etildi.

OʻFA birinchi vitse-prezidenti Ravshan Ermatov tahlillar yurtimizda ayollar futboli boʻyicha murabbiy, shifokor va psixolog kabi mutaxassislar kam ekanligini koʻrsatganligini, bu borada OʻFA ayollar murabbiylarini barcha turdagi litsenziyaga bepul oʻqitish tizimini yoʻlga qoʻyganligini aytib oʻtdi.

Shuningdek, bu yildan boshlab klublar smetasini tasdiqlashda ayollar futbolini rivojlantirishga, xususan jamoalarning tashkiliy ishlari, ekipirovka, ovqatlanish va vitaminizatsiyasiga qancha mablagʻ ajratilishi ham eʼtiborga olinayotganini taʼkidlandi.

Ayollar milliy terma jamoamizga tajribali mutaxassis Midori Honda jalb etilishi ortidan futbolimizga yapon mentalitetiga xos professionallik, talabchanlik, qatʼiyat va intizom kabi xarakterlarni shakllantirish maqsad qilingani aytildi. Oʻz oʻrnida Midori Honda ham Yaponiyada ayollar futbolini rivojlantirish avvalo nimadan boshlangani haqidagi savollarga javob berdi va oʻzining tajribalari bilan boʻlishdi.

Yigʻilishda shuningdek, murabbiylar ham bir qator masalalar yuzasidan oʻzlarining takliflarini bildirib oʻtdilar. OʻFA rahbariyati mavjud masalalarni oʻrganib chiqilishi va muammolarga yechim berilishini taʼkidladi. Masʼullarga xalqaro tajribalarni oʻrgangan holda ayollar futbolini rivojlantirishning yoʻl xaritasini tuzish boʻyicha koʻrsatma berildi.