Kecha «Paxtakor» ikki nafar legioner — Kamen Xadjiyev (Bolgariya) va Aleksey Larin (Ukraina) bilan shartnoma imzoladi. Natijada O‘zbekistonning amaldagi chempioni safidagi legionerlar 4 nafarga yetdi:

Dragan Cheran (Serbiya)
Oliver Sharkich (Chernogoriya)
Kamen Xadjiyev (Bolgariya)
Aleksey Larin (Ukraina)

Bundan bir yil avval OFK tashkiloti Chempionlar ligasida klublarga "3+1" ko‘rinishida legionerlarni ro‘yxatdan o‘tkazishga ruxsat berardi. Hozirda esa OCHL reglamenti o‘zgardi. Hozir klublar milliy chempionatda necha nafar legionerni ro‘yxatdan o‘tkazgan bo‘lsa, ularning barchasini OCHLda ham ro‘yxatdan o‘tkazish imkoniyatiga ega. Ammo aynan bir uchrashuv qaydnomasiga jamoalar "3+1" shaklida legionerlarni kiritishi mumkin (bu yerda +1 osiyolik futbolchiga ajratilgan qo‘shimcha o‘rin ekanini bilasiz).

Ya’ni «Paxtakor» barcha legionerlarni umumiy ro‘yxatdan o‘tkazishi mumkin. Murabbiylar har bir o‘yinda faqat 3 nafar legioner xizmatidan foydalanishi mumkin.

«Paxtakor» bir necha yillardan buyon osiyolik futbolchilar xizmatidan foydalanmayapti.

Alisher Nikimbayev.