2021 yilning 1 dekabr kuni “Sho‘rtan gaz kimyo majmuasi” MCHJ ijro organining 018/75-sonli yig‘ilish bayoniga muvofiq “Sevinch” ayollar futbol klubi belgilangan tartibda qo‘shish bo‘yicha tugatilib, futbol klubining moddiy-texnik bazasini yanada mustahkamlash, boshqaruvini takomillashtirish, klub faoliyatini rivojlantirish, uning nufuzini yanada oshirish maqsadida “Nasaf” futbol klubi tarkibiga qo‘shilgan.

Mazkur jarayonda “Sevinch” va “Nasaf” klublaridagi bir-birini takrorlovchi ortiqcha shtat birliklarini maqbullashtirilishi natijasida “Sevinch” jamoasining boshqaruv tarkibini qayta ko‘rib chiqish maqsad qilingan. Ya’ni, “Sho‘rtan gaz kimyo majmuasi” MCHJ klublardagi ortiqcha harajatlarni kamaytirishga qaror qilgan. Endilikda “Nasaf”ning malakali mutaxassislari “Sevinch” futbol jamoasi faoliyatini tashkil etishda bevosita ishtirok etadi.  

“Sevinch” futbol klubi “Nasaf” futbol klubiga qo‘shilganidan kelib chiqib, 2022 yilning 21 yanvar kuni qayta davlat ro‘yxatidan o‘tkazilgan. Mazkur ayollar jamoasi jahonda o‘z nomi va o‘rniga ega ekanligidan kelib chiqib, “Sevinch” nomi saqlab qolingan. Shundan kelib chiqib, “Nasaf” ayollar jamoasi “Sevinch” nomi bilan O‘zPFL musobaqalarida ishtirok etadi.

Ma’lumot uchun, OFK lisenziyalash reglamentiga ko‘ra, har bir erkaklar klubi qoshida ayollar jamoasining bo‘lishi tavsiya etiladi.