Kecha Coca Cola Superliga 2022 bahslari uchun qur’a tashlash marosimi bo‘lib o‘tdi. Birinchi turda «Olimpik» «Surxon»ga qarshim maydonga tushadi. Qur’a tashlash marosimi va turnir haqida jamoamiz bosh murabbiyi Timur Kapadze o‘z fikrlarini bildirdi.

"Manimcha, qur’a ancha yaxshi o‘tdi. «Sport» kanalida yaxshi tashkil etildi. Birinchi bahsda kimga qarshi maydonga tushishimizni kutayotgan edik. Umuman olganda, birinchi turlarda hamma jamoalarning imkoniyatlari teng bo‘ladi deb o‘ylayman.

Har bir uchrashuv qiziq va qiyin bo‘lishi aniq. «Olimpik» jamoasi Superligada debyut qiladi va bu bizga katta tajriba bo‘ladi deb o‘ylayman. Bu uchrashuvlar orqali oldimizga qo‘lgan vazifamizni uddalaymiz. Birinchi turda «Surxon» bilan tushdik. Umuman olganda, kimga qarshi maydonga tushishimizni ahamiyati yo‘q. Chunki hamma bilan qaysidir turda to‘qnash kelishimiz aniq. Musobaqani uyda boshlashimiz esa yaxshi deb o‘ylayman.

Biz autsayder bo‘lib qolmaymiz deb o‘ylayman. Chunki tayyorgarligimiz ancha yaxshi o‘tmoqda. Biz o‘z o‘yinimizni ko‘rsatamiz. Bolalar ham bunga tayyor. Hamma jamoani hurmat qilamiz, lekin hech bir raqibdan qo‘rqmaymiz. Bari maydonda hal bo‘ladi. Biz barchasiga tayyormiz", — dedi Timur Kapadze.