“Napoli” yarim himoyachisi Stanislav Labotka va hujumchi Matteo Politano “Barselona”ga qarshi Yevropa ligasi 1/16 finalining birinchi o‘yinida Italiya klubiga yordam bera olishmaydi. Bu haqda neapolliklar klubi matbuot xizmati rasmiy saytida xabar bermoqda.
Ma’lum bo‘lishicha, har ikki futbolchi 14-fevral kuni ertalab tibbiy ko‘rikdan o‘tgan, natijada ularda payshanba (17-fevral) kuni Ispaniya jamoasi bilan o‘yinda maydonga tushishga imkon bermaydigan jarohatlari borligi aniqlangan. 28 yoshli Politano o‘ng sonining mushagini shikastlagan, 27 yoshli Lobotkada esa o‘ng son son suyagidan jarohat olgan.
Yevropa ligasi doirasidagi “Barselona” – “Napoli” uchrashuvi 17-fevral, payshanba kuni Ispaniyadagi “Kamp Nou” stadionida bo‘lib o‘tadi. Javob o‘yini 24 fevral kuni Neapoldagi “Diyego Armando Maradona” (San-Paolo) stadionida bo‘lib o‘tishi belgilangan.
