O‘zingizga ma’lum, yangi mavsum boshida «Nasaf» futbol klubi rahbariyatida o‘zgarish bo‘lgandi. Bugun «Markaziy» o‘yingohdagi matbuot anjumanlari zalida jamoamizning faol muxlislari va OAV xodimlari bilan ochiq suhbat bo‘lib o‘tdi. Yig‘ilishda «Nasaf» futbol klubi bosh direktori Alisher Yusupov, jamoamiz bosh murabbiyi Ro‘ziqul Berdiyev va «ajdarlar»ning yetakchi futbolchilari Umidjon Ergashev, Sherzod Nasrullayev, Akmal Mozgovoylar yig‘ilishda ishtirok etishdi.
Tadbir qatnashchilari klubimiz rahbariyatidan 2022 yildagi rejalar va maqsadlar haqida o‘zlari qiziqtirgan savollar javob olishdi.
Yaqindagina klubning bosh direktori lavozimi tayinlangan Alisher Ismailovich Yusupov o‘ziga bildirilgan ishonch uchun klub rahbariyatiga o‘z minnatdorchiligini bildirib o‘tib, «Nasaf» futbol klubini yanada rivojlantirish uchun bor kuchi bilan harakat qilishini aytib o‘tdi va bundan keyingi uchrashuvlar bundanda yuqori saviyada bo‘lishini ta’kidladi.
Ro‘ziqul Berdiyev yangi mavsumga tayyorgarlik jarayoni va Turkiya yig‘ini haqida ham muxlislarga o‘z fikrlarini bildirib, hozirgi kunda jamoaga yana bir hujumchi kerakligini, seleksiya ishlari davom etayotganini aytib o‘tdi.
Jamoamizning yetakchi futbolchilari Umidjon Ergashev, Akmal Mozgovoy hamda Sherzod Nasrullayevlar ham yangi futbol mavsumiga tayyor ekanliklari va sovrinli o‘rinlar uchun kurashishlarini aytib o‘tishdi.
Yig‘ilish so‘ngida «Nasaf» futbol klubi rahbariyati muxlislar klubiga o‘z sovg‘alarini topshirdi.