Bolgariyaning Sofiya shahrida boks bo‘yicha xalqaro an’anaviy Stranja Kubogi musobaqasining oltinchi kungi bahslari 25 fevral, juma kuni bo‘lib o‘tmoqda.

-51 kg vazn toifasida harakat qilayotgan Hasanboy Do‘stmatov qozog‘istonlik Temur Kabdeshovga qarshi ringga chiqdi. O‘zbekistonlik bokschi raqibiga hech qanday imkoniyat qoldirmadi va 5:0 hisobida g‘alaba qozondi.

Shu tariqa Hasanboy musobaqaning finaliga yo‘l oldi. Finalda o‘zbekistonlik bokschiga yana bir qozog‘istonlik Abdikadir Damir raqiblik qiladi. Damir yarim finalda Rossiya vakili Mnasakanyan Voloni taslim etdi.

Bundan avvalgi bosqichda Hasanboy rossiyalik Yevgeniy Martinov ustidan 5:0 hisobida g‘alaba qozongandi. Musobaqaning dastlabki turida esa Do‘stmatovning raqibi ringga chiqmagan va to‘g‘ridan-to‘g‘ri keyingi bosqichga yo‘l olgandi.

Hasanboydan tashqari 25 fevral sanasida Abdumalik Halokov, Odiljon Aslonov, Madiyor Saidrahimov, Mujibillo Tursunov, Lazizbek Mullajonov final yo‘llanmasi uchun kurash olib boradi. Tursunoy Rahimova esa ukrainalik bokschiga mag‘lub bo‘lib, finalga chiqish imkoniyatini yo‘qotdi.