22-27 fevral kunlari Bolgariya poytaxti Sofiya shahrida boks bo‘yicha nufuzli "Stranja" xalqaro turniri bo‘lib o‘tdi. "Kichik jahon chempionati" sifatida e’tirof etiladigan mazkur turnir o‘z tarixida 73-marotaba tashkil etildi. Unda jahonning 37 mamlakatidan 370 nafardan ortiq erkak va ayol bokschilari ishtirok etishdi.
Musobaqa erkaklar o‘rtasida 13, ayollar o‘rtasida esa 12 ta vazn toifasida tashkil etildi. O‘zbekiston terma jamoasi mazkur turnirda 8 nafar erkak va 5 nafar ayol bokschi bilan qatnashib, 6 ta oltin va 1 ta bronza medalini qo‘lga kiritdi.
Quvonarlisi, musobaqa yakuniga ko‘ra, O‘zbekiston terma jamoasi 6 ta oltin medal bilan umumjamoa hisobida birinchi o‘rinni egalladi. Rossiya terma jamoasi esa 5 ta oltin bilan ikkinchi o‘rindan joy oldi (2 ta erkaklar, 3 ta ayollar). Kuchli uchlikka esa Qozog‘iston terma jamoasi 4 ta oltin medal bilan yakun yasadi (2 ta erkaklar, 2 ta ayollar).
Mezbon Bolgariya esa bu borada 4-o‘rinda qoldi.
Stranja kubogi-2022. Medallar jadvali (top-5)
1. O‘zbekiston — 6-0-1 (7)
2. Rossiya — 5-5-11 (21)
3. Qozog‘iston — 4-4-9 (17)
4. Bolgariya — 3-4-5 (12)
5. Hindiston — 2-0-1 (3).
Terma jamoamiz safida quyidagi bokschilarimiz sovrindor bo‘lishdi:
Oltin:
-51 kg: Hasanboy Do‘smatov
-57 kg: Abdumalik Xalakov
-63,5 kg: Mujibillo Tursunov
-80 kg: Odiljon Aslonov
-92 kg: Madiyar Saidrahimov
+92 kg: Lazizbek Mullojonov
Bronza:
-52 kg: Tursunoy Rahimova
O‘zbekiston terma jamoasi 28 fevraldan 1 martga o‘tar kechasi soat 02:00da yurtimizga qaytib keladi. Bokschilarimizni kutib olishni istagan OAV xodimlari va muxlislarimizni Islom Karimov nomidagi Toshkent xalqaro aeroportiga chorlab qolamiz.
