Superliga-2022 dastlabki turi doirasi «Dinamo» jamoasi Samarqandda mamlakatning amaldagi chempioni, O‘zbekiston Superkubogi sohibi «Paxtakor» jamoasini qabul qiladi. O‘yin oldidan bayramona konsert va ochilish marosimi o‘tkaziladi.
O‘yinni Vadim Agishev boshqarib boradi
PFL Superliga 1-tur uchrashuvlarini boshqarib boradigan hakamlar ro‘yxatini e’lon qildi. Unga ko‘ra, 1-tur doirasida Samarqandda o‘tadigan bahsni toshkentlik Vadim Agishev boshqarib boradigan bo‘ldi.
Superliga. 1-tur
3 mart (payshanba)
Dinamo – Paxtakor
O‘yin boshlanish vaqti: 18:30
Hakamlar: Vadim Agishev, Rishat Nugmanov, Doniyor Saylalov, Nayim Qosimov
Nazoratchi: Konstantin Smirnov
Komissar: Shohrux Said
Hozirgi holat
“Paxtakor” jamoasi mavsumni 27 fevral kuni O‘zbekiston Superkubogi uchun kechgan “Nasaf”ga qarshi o‘yin bilan boshladi. Makedoniyalik mutaxassis Slavche Voyneski murabbiyligidagi Toshkent klubi Yaypanda kechgan uchrashuvda “Nasaf”ni mag‘lub etib (1:0), navbatdagi Superkubok egasiga aylandi.
“Paxtakor” mavsum oldidan odatdagidek Turkiyada tayyorgarlik olib bordi. “Dinamo” jamoasi ham 3-24 fevral kunlari Turkiyaning Antaliya shahrida yangi mavsumga hozirlik ko‘rdi.
O‘zaro o‘yinlar
Oliy Liga tarixida “Dinamo” va “Paxtakor” jamoalari 48 marta uchrashishgan. Bahslarning 37tasida “Paxtakor”, 6tasida esa “Dinamo” g‘alaba qozongan, 5ta o‘yin durang bilan yakunlangan. “Dinamo” va “Paxtakor” o‘rtasidagi Samarqanddagi so‘nggi o‘yin 2019 yilda o‘tib, o‘shanda 1:4 hisobi qayd etilgan. Toshkentdagi 1-davrada o‘tkazilgan o‘yinda esa 2:0 hisobida “Paxtakor” g‘alaba qozongan.
Kimlar maydonga tushmaydi?
Bugungi bahs oldidan ikki jamoa ham jangovar tayyorgarlikka ega. “Paxtakor” tarkibida yo‘qotish yo‘q, murabbiy barcha futbolchilarni maydonga tushirishi mumkin. “Dinamo” bosh murabbiyi Predrag Rogan esa “Nasaf”dan ijara olingan himoyachi Jo‘rabek Mannonovni maydonga tushira olmaydi. Sababi ushbu o‘yinchi o‘tgan mavsum yakunida “Nasaf” safida qizil kartochka olgani sababli, “Paxtakor” bilan bahsni o‘tkazib yuborishiga to‘g‘ri keladi.
