Roman Abramovichning «Chelsi»dagi davri tugadi - rossiyalik tadbirkor sanksiyalar tahdidi ostida London klubini sotmoqda. Biroq bu klubga aloqador va befarq bo‘lmagan barcha insonlarni ranjitgani bor gap. Tomas Tuxel ham Abramovich qo‘l ostidagi davrni ancha muvaffaqiyatli bo‘lganini ta’kidladi: «Men «Chelsi»ni faqat Roman Abramovich bilan tasavvur qila olaman. Shu sababli endi biz uchun qiyin palla boshlanmoqda. Bunga ko‘nikish oson emas», - deydi Tuxel.
Statistikaga yuzlanadigan bo‘lsak, «Chelsi» Abramovich qo‘l ostida 21 sovrinni qo‘lga kiritgan. Bu klubning 100 yillik tarixidagi eng yaxshi natija hisoblanadi.
Abramovich qo‘l ostida «Chelsi» 5 marta Premyer-liga chempionligini qo‘lga kiritdi (bu davr oralig‘ida hech bir klub londonliklarchalik tez-tez muvaffaqiyat qozona olmagan. «MYU» va «Man Siti»ning unvonlari bir xil). Xo‘jayini almashguniga qadar jamoa so‘nggi yetti mavsum davomida doimiy ravishda kuchli oltitalikda bo‘lgan, biroq atigi bir marta kuchli uchlikka kirgan xolos. Abramovich kelganidan so‘ng, «Chelsi» faqat bir marta kuchli oltilikdan tashqarida mavsumni yakunlagan, shuningdek, atigi uch marta kuchli to‘rtilikka kira olmadi.
2003 yildan beri «Chelsi» 5 marta Angliya kubogini qo‘lga kiritdi, bu «Arsenal» bilan bir xil ko‘rsatkich. Agar Liga Kubogidagi sovrinlarni ham qo‘shib hisoblasa (3), bu davr oralig‘ida boshqa hech qaysi klub 8 tadan ortiq sovrin yuta olmagan. Albatta, «Man Siti»dan tashqari.
Kuboklarning umumiy miqdori ham hayratlanarli darajada – «Chelsi» va «MYU»da 21, «Siti»da 16, «Arsenal»da 11, «Liverpul»da 10 tadan titul.
«Chelsi» bu davrda APLda to‘plangan ochkolar soni bilan peshqadam - 1449ta! «Manchester Yunayted» o‘tgan yillardagi muvaffaqiyati tufayli ikkinchi o‘rinda qolmoqda, ammo undan keyingi jamoalar orasidagi farq juda ham katta.
1. «Chelsi» — 1449
2. «Man Yunayted» — 1447
3. «Liverpul» — 1346
4. «Arsenal» — 1344
5. «Man Siti» — 1328
6. «Tottenxem» — 1192
Abramovichning shu paytgacha kiritib kelgan sarmoyasi «Chelsi»ni o‘rta darajadan Angliyaning top klublaridan biriga aylantirdi. Endi «Chelsi»siz kuchli to‘rtlikni tasavvur etib bo‘lmaydi. Abramovichni esa balki ehtimoliy jamoasida yana katta yutuqlar kutib turgandir.
Quyida funksionerning ushbu voqealarga nisbatan bildirgan ilk fikrlarini e’tiboringizga havola etamiz.
«Men «Chelsi»ga egalik qilishim borasida so‘nggi bir necha kun ichida ommaviy axborot vositalarida tarqalgan mish-mishlarga javob bermoqchiman.
Yuqorida aytganimdek, men har doim klub manfaatlaridan kelib chiqqan holda qaror qabul qilganman. Shu bois, hozirgi vaziyatdan kelib chiqib klubni sotishga qaror qildim, chunki bu «Chelsi» muxlislari, xodimlari hamda homiy va hamkorlar manfaatiga to‘g‘ri keladi deb o‘ylayman.
Men hech qanday qarz to‘lashni so‘ramoqchi emasman, men uchun bu hech qachon katta pul ortidan quvish kabi bo‘lmagan, balki klubga bo‘lgan sof ishtiyoqim tufaylidir. Bundan tashqari, men o‘z jamoamga tushadigan barcha sof daromadlar yo‘naltiriladigan xayriya jamg‘armasini yaratishni buyurdim. Jamg‘arma Ukrainadagi barcha jabrdiydalarning manfaatlarini ko‘zlab tuziladi. Bu jabrlanganlarning favqulodda va tezkor ehtiyojlarini qondirish uchun yetarli mablag‘lar bilan ta’minlash, shuningdek, uzoq muddatli tiklanish sa’y-harakatlarini o‘z ichiga oladi.
Bu qaror nihoyatda og‘ir bo‘ldi. Biroq, klub manfaati yo‘lida bunga roziman. Umid qilamanki, «Stemford Brij»ga oxirgi marta tashrif buyurib, barchangiz bilan shaxsan xayrlashaman. «Chelsi»ning bir qismi bo‘lish bir umrlik sharaf edi. Men barcha yutuqlarimizdan faxrlanaman. «Chelsi» futbol klubi va uning muxlislari qalbimda abadiy qoladi.
Rahmat sizlarga».
