Agar siz Krishtianu Ronaldusi bor futbol klubini boshqarayotgan bo‘lsangiz, portugaliyalik har qanday holatda ham siz tomonda ekanligiga ishonch hosil qilganingiz ma’qul. Buni «Manchester Yunayted»ning amaldagi bosh murabbiyi Ralf Rangnik hisobga olishi kerak. Murabbiy hozirda portugaliyalik bilan yaxshi til topisha olmayapti.
Ilgari ham shunday bo‘lgan, agar Ronaldu murabbiyni yoqtirmasa, tez orada o‘sha murabbiy ishdan bo‘shatiladi. Esingizda bo‘lsa, Maurisio Sarri bilan Italiyada ham shunday bo‘lgan. El Pais nashri xabariga ko‘ra, 2015 yilda Ispaniyada Rafa Benites bilan ham shunga o‘xshash holat yuz bergan.
Nashrning yozishicha, o‘sha paytda «Real» ustozi hisoblangan Benites Krishtianuga talab qo‘ygan va portugaliyalikka ba’zi himoyachilarning o‘yin uslubini o‘rganish kerakligi haqida topshiriq bergan. Ronalduga bu g‘oya yoqmadi va ertasi kuni Benitesning yordamchilariga o‘z gollari yozib olingan USB flesh-diskini sovg‘a qildi va «Benitesga ayting, bu mening barcha gollarim yozilgan flesh-disk. Murabbiy ularni o‘rgansin», - deya aytgan Ronaldu.
