Агар сиз Криштиану Роналдуси бор футбол клубини бошқараётган бўлсангиз, португалиялик ҳар қандай ҳолатда ҳам сиз томонда эканлигига ишонч ҳосил қилганингиз маъқул. Буни «Манчестер Юнайтед»нинг амалдаги бош мураббийи Ральф Рангник ҳисобга олиши керак. Мураббий ҳозирда португалиялик билан яхши тил топиша олмаяпти.
Илгари ҳам шундай бўлган, агар Роналду мураббийни ёқтирмаса, тез орада ўша мураббий ишдан бўшатилади. Эсингизда бўлса, Маурисио Сарри билан Италияда ҳам шундай бўлган. El Pais нашри хабарига кўра, 2015 йилда Испанияда Рафа Бенитес билан ҳам шунга ўхшаш ҳолат юз берган.
Нашрнинг ёзишича, ўша пайтда «Реал» устози ҳисобланган Бенитес Криштиануга талаб қўйган ва португалияликка баъзи ҳимоячиларнинг ўйин услубини ўрганиш кераклиги ҳақида топшириқ берган. Роналдуга бу ғоя ёқмади ва эртаси куни Бенитеснинг ёрдамчиларига ўз голлари ёзиб олинган USB флеш-дискини совға қилди ва «Бенитесга айтинг, бу менинг барча голларим ёзилган флеш-диск. Мураббий уларни ўргансин», - дея айтган Роналду.
