Italiya. «Roma» Italiya chempionati 28-turida «Atalanta»ni qabul qilib, yagona gol evaziga 3 ochkoni o‘z tomoniga og‘dirdi. Biroq jamoa bosh murabbiyi Joze Mourinyo bu safar hamyurtimiz Eldor Shomurodovni hattoki, zaxiradan ham maydonga tushirmadi.
Rossiya. «Nijniy Novgorod»da alamli mag‘lubiyat. Ibrohimxalil Yo‘ldoshevning jamoasi RPL 20-turidan o‘rin olgan SSKAga qarshi safar o‘yinini 90-daqiqada qo‘yib yuborilgan gol tufayli boy berdi. Boshlang‘ich tarkibda maydonga tushgan legionerimiz 84-daqiqada SSKA vakili Mario Fernandes bilan to‘qnashib ketdi. Buning oqibatida raqibning burni sindi va har ikki futbolchini almashtirishga to‘g‘ri keldi. Whoscored portali Yo‘ldoshevning o‘yindagi harakatiga 7,3 ball qo‘ydi. Bu «Nijniy Novgorod» vakillariga berilgan eng yuqori bahodir.
Qozog‘iston. Yaqindagina «Ordabasi» safiga qo‘shilgan Odil Abdumajidov mamlakat chempionati 1-turida «Maxtaaral»ga qarshi kechgan uy uchrashuvida to‘liq 90 daqiqa to‘p surdi. Biroq Shimkent jamoasi liga debyutantini yenga olmadi - 1:1. «Qayrat» chempionatni «Aktobe»ga qarshi o‘yin bilan boshlab, 2:0 hisobida ustun keldi. Ammo jamoa bosh murabbiyi Qurbon Berdiyev ilk o‘yinda Jasur Jaloliddinovni zaxirada qoldirdi. Mavsum starti Igor Sergeev uchun omadli keldi. «Tobol» hujumchisi «Akjayik» bilan bahsda to‘liq vaqt o‘ynab, jamoasi g‘alabasini ta’minlagan yagona gol muallifi bo‘ldi.
Saudiya Arabistoni. «Al-Nasr» mamlakat Premyer-ligasi 23-turida «Al-Hilol»ni qabul qilib, raqibga umuman qarshilik ko‘rsatolmadi - 0:4. Jamoa yarim himoyachisi Jaloliddin Masharipov ushbu omadsiz uchrashuvning 57-daqiqasida maydonga tushdi. Bu vaqtda hisob 0:3 edi, «Hilol» keyinchalik yana bitta gol urdi.
BAA. Birlashgan Arab Amirliklari Pro ligasi 18-turidan o‘rin olgan «Al-Jazira» - «Sharja» uchrashuvida 1:0 hisobi qayd etildi. Mehmon jamoa yarim himoyachisi Otabek Shukurov mag‘lubiyat bilan yakunlangan o‘yinda to‘liq 90 daqiqa to‘p surdi. «Shabab Al-Ahli» - «Al-Vahda» (1:3) o‘yinida mezbonlar yarim himoyachisi Aziz G‘aniyev maydonga tushgani yo‘q.
Qatar. Doston Hamdamov Yulduzlar ligasi 21-tur o‘yinida 82 daqiqa o‘ynab, gol urdi. Biroq uning jamoasi - «Al-Sayliya» yakunda «Al-Ahli» bilan ochkolarni bo‘lishib oldi - 2:2.
Belarus. BATE chempionat startidan oldin amaldagi chempion - «Shaxtyor»ni 1:0 hisobida yengish asnosida mamlakat superkubogini qo‘lga kiritdi. Borisov jamoasi yetakchilaridan biri Shahboz Umarov o‘yin qaydnomasiga kiritilmadi (oldinroq uning bosh murabbiy nafratiga uchragani va transferga qo‘yilishi haqida xabarlar chiqqandi).
Moldova. Mamlakat chempioni - «Sherif» mahalliy liga 7-turida «Sfintul»ga qarshi o‘yinni Jasur Yaxshiboyevsiz o‘tkazib, 2:0 hisobida g‘alaba qozondi.
