Bugun va ertaga Yevropa Chempionlar Ligasi joriy mavsumining nimchorak final javob bahslari o‘tkaziladi.
Ko‘pchilikning nigohi "Old Traford"da bo‘ladigan MYU - «Atletiko» o‘yiniga qaratilgan. Mazkur to‘qnashuvda ko‘plab epizodlar bo‘lishi kutilmoqda. «Ayaks» va «Yuventus» ham birinchi uchrashuvlarda durang natija qilgandan keyin o‘z maydonlarida raqiblarni qabul qilishadi. «Chelsi» esa «Lill» mehmoni bo‘ladi.
Bugun va ertaga bizni qanday o‘yinlar kutmoqda. To‘xtalib o‘tamiz.
Nimchorak final javob bahslari, to‘rtinchi hafta
15 mart, seshanba
"Manchester Yunayted" - «Atletiko» (Birinchi o‘yin: 1-1)
«Ayaks» - «Benfika» (2-2)
16 mart, chorshanba
«Yuventus» - «Vilyarreal» (1-1)
«Lill» - «Chelsi» (0-2)
Barcha o‘yinlar O‘zbekiston vaqti bilan 01:00da boshlanadi.
Suarez sobiq jamoasining asosiy raqibi bilan bellashadi
«Atletiko» hujumchisi Luis Suares Angliyaning «Liverpul» safida faoliyat olib borgan davrida MYU bilan jiddiy raqobatlashgan va u bugun yana o‘sha azaliy raqib - «MYU» stadioniga tashrif buyuradi. U bugun asosiy ishni qilmasa ham Luisning Angliyaga bo‘lgan oldingi tashriflari yomon chiqmagan.
2014/15 yilgi mavsumning nimchorak finalida Suares «Barselona» safida "Manchester Siti" bilan kechgan safar bahsida dublga erishgandi.
Ammo, urugvaylik futbolchining "tumanli o‘lka"ga so‘nggi safari muvaffaqiyatli chiqmaganini aytib o‘tish kerak. 2019 yilda «Liverpul» o‘z maydonida «Barselona» ustidan yirik 4:0 hisobida g‘alaba qozonib final yo‘llanmasiga ega chiqqandi.
"Manchester Yunayted" safida esa o‘tgan hafta Angliya chempionati doirasidagi «Tottenxem»ga qarshi bahsda xet-trik qayd etib, katta sahnaga chiqqan Krishtianu Ronaldu bugungi o‘yinda ham yetakchilikni o‘z qo‘liga olishi mumkin.
Chempionlar Ligasi tarixidagi eng yaxshi to‘purar ushbu musobaqada «Atletiko»ga qarshi 11 o‘yinda 7 gol urishga muvaffaq bo‘lgan.
Barchasi Allega bog‘liq emas
Hammaga e’tibor qaratish qiyin. Ammo, bugungi o‘yinda «Ayaks» hujumchisi Sebastyen Allega ko‘proq e’tibor beriladi. U haqida ikkita faktni aytib o‘tish kerak.
27 yoshli hujumchi Chempionlar Ligasidagi ilk 7 o‘yinida gol urgan va musobaqa tarixida debyut 7 uchrashuvda gol kiritgan birinchi futbolchiga aylangan. Bundan tashqari 11 gol urish uchun eng kam o‘yin saflagan o‘yinchi sifatida ham e’tirof etiladi.
Barchasi Allega bog‘liq emas. Tajribali Dushan Tadichning ijodkorligi hamda braziliyalik Antonining uzatmalari Allening golli seriyasini davom ettirishga yordam beradi. Pley-meyker joriy mavsum Chempionlar Ligasida o‘z hisobiga 5 assistni yozdirib qo‘ygan holda faqatgina Brunu Fernandesh (7) va Leroy Sanedan (6) ortda bormoqda.
Amsterdamga safar qiladigan «Benfika» jamoasi mezbon jamoaning mana shu hujum uchligi haqida ko‘proq bosh qotirishiga to‘g‘ri keladi.
Bugungi ikki uchrashuv ham Toshkent vaqti bilan 01:00da boshlanishi rejalashtirilgan.
