Superliganing 3-turidan o‘rin olgan “Bunyodkor” – “Lokomotiv” (2:1) uchrashuvidan keyin mezbonlar bosh murabbiyi Shuhrat Maqsudov o‘z fikrlari bilan o‘rtoqlashdi.
- Avvalo xalqimizni yaqinlashib kelayotgan Navro‘z bayrami bilan chin yurakdan tabriklayman! Yurtimizga ko‘z tegmasin! Shuningdek, bugungi g‘alaba uchun futbolchilarimga, butun bellashuvni bevosita stadionda tomosha qilib, bizni qo‘llab-quvvatlab turgan klubimiz prezidenti Mehriddin aka Abdullayevga hamda muxlislarimizga minnatdorchilik bildiraman!
Superliganing dastlabki ikki turida yaxshi o‘yin ko‘rsatgan bo‘lsakda, g‘alaba qozona olmagan edik. Yaxshi o‘yinlarimiz uchun futbolchilarimning harakatlaridan qoniqish hosil qilgandim. Bugun yigitlar ko‘rsatmalarimizni to‘liq bajarishdi. Albatta, xatolar bo‘ldi, busiz iloji yo‘q. Ishlamagan insongina xato qilmaydi. Asosiysi, xatolardan xulosa chiqarish. “Lokomotiv” jamoasiga kelgusi o‘yinlarda omad tilayman!
Yigitlarda ishtiyoq yuqori. Tarkibimiz yosh, akademiya tarbiyalanuvchilari hisoblanadi. Shu bois bosim bo‘lishi tabiiy. Tanaffusda yigitlarga kerakli ko‘rsatmalarni berdik. Ikkinchi bo‘limda o‘z uslubimizda o‘ynadik. Natija yaxshi bo‘ldi. Biroq futbol 90 daqiqa davom etadi. Xotirjamlikka berilish oqibatida gol o‘tkazib yubordik. O‘yindan o‘yinga rivojlanamiz, degan umiddaman.
