Meksikaning Keretaro shahrida joylashgan «Korrexidora» stadionida mahalliy «Gallos» va «Atlas» klublari muxlislari o‘rtasida yuz bergan ommaviy mushtlashuv - fojia ta’sirli voqealarni ham keltirib chiqardi. Masalan, bir bolakayning raqib jamoa muxlisi hayotini saqlab qolish ilinjida o‘z futbolkasini unga tortiq etgani eng bag‘ritosh odamni ham o‘ylantirib qo‘yishi tayin.
Ta’sirli voqea tafsiloti
Martin Kastelyanos Vilyalobos - Meksika ligasi doirasidagi o‘yinni ko‘rish uchun Keretaro shahriga yo‘l olgan va uchrashuvning ikkinchi yarmida ikki tomon fanatlari o‘rtasida yuzaga kelgan shafqatsiz mushtlashuvda ishtirok etgan «Atlas» tarafdorlaridan biri. Martin mahbubasini qutqarish ilinjida stadiondan chiqib ketishga astoydil uringan pallada unga Adolfo ismli bolakay yordam berdi. Oddiy aytganda, yosh muxlis mehmonga o‘z egnidagi «Gallos» futbolkasini yechib berdi. «Atlas» fanati shu tariqa quturgan olomon ichidan omon chiqib oldi. Keyinchalik Adolfo ota-onasi bilan birga Martin va mahbubasini avtomobilga chiqib olishlarigacha kuzatib qo‘ydi.
Ijtimoiy tarmoqlar orqali qidiruv
Martin Kastelyanos ortga qaytgach, ijtimoiy tarmoq orqali o‘sha bolakayni qidirishga tushdi. Tabiiyki, u bunda o‘z qutqaruvchisiga minnatdorchilik yo‘llashni maqsad qilgandi. «Bu xabarni yuzimizdagi umidsizlikni ko‘rib, menga o‘z futbolkasini bergan qahramon bolakay va uning ota-onasiga yo‘llayapman. Ular bizning stadiondan omon chiqib olishimizga katta yordam berishdi. Hayotimizni saqlab qolgan kishilarga minnatdorchilik bildirish uchun munosib so‘z topolmayapman...», - deb yozdi «Atlas» muxlisi.
Adolfoga minnatdorchilik
Martin yo‘llagan xabar ijtimoiy tarmoqlarda keng tarqaldi va u Adolfoni tezda topdi. Shu tariqa bolakayga dramatik voqealar jarayonida ko‘rsatgan insoniylik yordami uchun minnatdorchilik bildirdi. «Yozgan xabarim samara berdi! ADOLFO ismli qahramon bolakayni topib, unga o‘z futbolkasini berib, hayotimni saqlab qolgani uchun rahmat aytmoqchi edim. Takror aytaman, Adolfo va uning ota-onasidan abadiy minnatdormiz», - deb yozdi Kastelyanos «Feysbuk»da qoldirgan ikkinchi postida.
