1993 yil 18 mart kuni Vazirlar Mahkamasining «O‘zbekiston Respublikasida futbolni yanada rivojlantirish chora-tadbirlari to‘g‘risida»gi 144-sonli Qarori e’lon qilingandi. Bu mamlakatda futbolni rivojlantirishga bag‘ishlangan dastlabki hujjat edi. Voqea tarixiy ahamiyatga ega bo‘lgan va ma’lum muddat 18 mart o‘zbek futboli kuni sifatida nishonlangan. Ammo o‘shandan buyon hukumat tomonidan futbolga taalluqli hujjatlar muntazam imzolandi va 144-qarorning aksariyat bandlari o‘z kuchini yo‘qotdi. Shu bois 18 mart chorak asr avvalgidek tarixiy ahamiyatga ega emas.
***
- Norasmiy ma’lumotlarga ko‘ra, o‘sha Qarorning qabul qilinishiga Mirjalol Qosimovning «Axborot» dasturiga bergan intervyusi sabab bo‘lgan. Suhbat davomida Qosimovdan O‘zbekiston chempionati bilan o‘zi bir yil avval qatnashgan Rossiya birinchiligi darajasini solishtirishni so‘rashgan. Savolning vujudga kelgani tushunarli, zero, intervyu uyushtirilishidan avvalroq o‘tkazilgan mavsumoldi turnirida «Paxtakor» raqibi (adashmasam, «Chirchiq» edi)ni 10:0 hisobida mag‘lubiyatga uchratgandi. Tabiiyki, Mirjalolning solishtiruvi bizning mamlakat chempionati foydasiga bo‘lmagandi. O‘shanda o‘zbek futbolini rivojlantirish uchun nimalar qilish kerakligi bo‘yicha dolzarb masala o‘rtaga tashlandi. Natijada, bir necha hafta ichida Qaror tayyorlanib, u 1993 yilning 18 martida dunyo yuzini ko‘rdi. Darvoqe, Qosimov o‘shanda aytganlari uchun 3 oyga futboldan chetlatilgani haqida gap-so‘zlar tarqalgandi. Diskvalifikasiya bo‘yicha rasmiy ma’lumot bo‘lmagan, albatta. Lekin fakt fakt-ligicha qoladi: Mirjalol maydonga faqat may oyida qaytgan. Aynan shu sababli Qosimov va Valeriy Kechinov «Paxtakor»da birga o‘ynay olishmaganini qo‘shimcha qilish darkor: Valera 1993 yilning mayida Moskvaning «Spartak» klubiga ketgan. Ammo bu endi alohida mavzu.
«Axborot» dasturining o‘sha sonida «Paxtakor» bosh murabbiyi Ahmad Ubaydullayevdan ham intervyu olishgan, mazkur suhbat ham negativ munosabatlarga sabab bo‘lgandi. Natijada mavsum boshida «Paxtakor»da rahbariyat almashdi. Umuman, o‘shanda jamoa yil davomida o‘ziga kelolmadi. Biroq 1993 yili «Paxtakor» va «Neftchi» o‘rtasida bo‘lgan uchrashuvni O‘zbekiston chempionatlari tarixidagi eng yorqini sifatida baholash mumkin. Ikkinchi davra doirasida Toshkent-da o‘tkazilgan, «Paxtakor»ning 5:4 hisobidagi g‘alabasi bilan yakunlangan mazkur o‘yin sifati, ehtiroslarning junbushga kelgani va dramatik ssenariysi bilan yodda qolgandi.
Alisher NIKIMBAYEV
