Xabaringiz bor, 24-27 mart kunlari Tailandda baydarka va kanoeda eshkak eshish bo‘yicha Osiyo chempionati bo‘lib o‘tdi. Unda muvaffaqiyatli ishtirok etgan jamoamiz Islom Karimov nomidagi Toshkent xalqaro aeroportida tantanali kutib olindi.
Marosimda Sportni rivojlantirish vazirining o‘rinbosari Shahrullo Mahmudov, Mudofaa hamda Energetika vazirligi mutasaddilari, O‘zbekiston ROWING&CANOE federasiyasi rahbariyati, Suv sporti turlari bo‘yicha Respublika oliy sport mahorati maktabi vakillari, sportchilarimizning yaqinlari ishtirok etishdi.
Shahrullo Mahmudov sportchilarimizni qo‘lga kiritilgan muvaffaqiyat bilan qutlar ekan, eshkak eshuvchilarimizga joriy yil Xanchjou shahrida o‘tadigan Osiyo o‘yinlarida ham mana shunday yuqori natijalar qayd etishlarini tilab qoldi.
Eslatib o‘tamiz, yoshlar va kattalar o‘rtasida tashkil etilgan musobaqada sportchilarimiz 16 ta oltin, 19 ta kumush va 8 ta bronza, jami 43 ta medal jamg‘arishgan edi.
