Karlush Keyrush JCH-2022ga yo‘l olmagani uchun Misr terma jamoasi bosh murabbiyi lavozimini tark etishga qaror qildi.
Kecha Misr va Senegal terma jamoalari o‘rtasida JCH-2022 saralash bosqichining javob uchrashuvi bo‘lib o‘tdi. Dastlabki o‘yinda misrliklar minimal hisobda g‘alaba qozongan bo‘lsa, javob o‘yinida senegalliklar penaltilar seriyasida g‘olib chiqishdi.
«Orzu amalga oshmadi. Biz hamma narsani qilishga harakat qildik, ammo bu yetarli emas edi. Misr futbol assosiasiyasiga terma jamoa murabbiyi sifatida ishlash baxtiga muyassar bo‘lganim uchun chin qalbimdan minnatdorchilik bildiraman. Barcha o‘yinchilarga va murabbiylar shtabiga katta rahmat. Siz mening qalbimda abadiy qolasiz», - deb yozadi Keyrush ijtimoiy tarmoqlarda.
69 yoshli mutaxassis Misr terma jamoasini 2021 yilning sentyabridan buyon boshqarib kelayotgandi. Uning qo‘l ostida jamoa Afrika kubogi finaliga qadar yetib bordi va finalda ham Senegaldan mag‘lub bo‘lgandi.
