Карлуш Кейруш ЖЧ-2022га йўл олмагани учун Миср терма жамоаси бош мураббийи лавозимини тарк этишга қарор қилди.
Кеча Миср ва Сенегал терма жамоалари ўртасида ЖЧ-2022 саралаш босқичининг жавоб учрашуви бўлиб ўтди. Дастлабки ўйинда мисрликлар минимал ҳисобда ғалаба қозонган бўлса, жавоб ўйинида сенегалликлар пенальтилар сериясида ғолиб чиқишди.
«Орзу амалга ошмади. Биз ҳамма нарсани қилишга ҳаракат қилдик, аммо бу етарли эмас эди. Миср футбол ассоциациясига терма жамоа мураббийи сифатида ишлаш бахтига муяссар бўлганим учун чин қалбимдан миннатдорчилик билдираман. Барча ўйинчиларга ва мураббийлар штабига катта раҳмат. Сиз менинг қалбимда абадий қоласиз», - деб ёзади Кейруш ижтимоий тармоқларда.
69 ёшли мутахассис Миср терма жамоасини 2021 йилнинг сентябридан буён бошқариб келаётганди. Унинг қўл остида жамоа Африка кубоги финалига қадар етиб борди ва финалда ҳам Сенегалдан мағлуб бўлганди.
