«Barselona» klubi «Liverpul» hujumchisi Muhammad Saloh bilan shartnoma imzolay olmaydi.

"As" nashri tarqatgan xabarga ko‘ra, 29 yoshli futbolchi maosh borasida yuqori talab qo‘ygani uchun kataloniyaliklar uni qo‘lga kiritish g‘oyasidan voz kechishdi. Saloh «Barsa»dan 5 yillik shartnoma va taxminan 17 million yevro yillik maosh talab qildi.

Bundan tashqari, "Barselona" Salohning transfer huquqini qo‘lga kiritishi oson bo‘lmaydi. Boisi, «Liverpul» misrlik futbolchi uchun kamida 70 mln yevro so‘raydi. Shu bois, «ko‘k-anorranglilar» prezidenti Joan Laporta o‘z e’tiborini Erling Xoland («Borussiya» Dortmund) va Robert Levandovski («Bavariya»)ga qaratishga qaror qildi.

«Barsa» norvegiyalik futbolchining transferini amalga oshirish ehtimoli yo‘q emas. Futbolchining agenti va otasi komissiya to‘lovlarini kamaytirishga rozi bo‘lishdi. Levandovskining transferi esa yanada arzonroqqa tushadi. Chunki, polshalik futbolchining o‘zi «Kamp Nou»ga ko‘chib o‘tishni istamoqda.