O‘zbekiston Kubogi doirasida "Dinamo" jamoasiga qarshi safarda bo‘lib o‘tgan o‘yindan keyin "Neftchi" jamoasi bosh murabbiyi Ilhom Mo‘minjonov qo‘lga kiritilgan g‘alabadan xursand ekanligini yashirmadi.

—Chempionatda ketma-ket uch marotaba mag‘lubiyatga uchraganimizdan keyin bugungi o‘yinda g‘alaba qozonishimiz shart edi va yigitlar buni yaxshi tushunib yetgan edilar. Bundan buyog‘iga kubok o‘yinlarida ham chiroyli natijalarga erishib, keyingi bosqichga chiqishga harakat qilamiz. Bugungi bahsda futbolchilarimiz oldiga qo‘yilgan vazifalarni to‘liq a’do etib, bor vujudi bilan o‘yin ko‘rsatganlariga alohida minnatdorchilik bildiraman. Endi navbatdagi "Qizilqum" bilan bo‘lib o‘tadigan turga jiddiy tayyorgarlik ko‘ramiz.

Rahbariyat tomonidan oldimizga chempionatda ham kubok bahslarida ham yuqori vazifalar qo‘yilgan. Bugungi g‘alaba yigitlarimizga ruhiy tomondan ijobiy ta’sir o‘tkazgan va keyingi turda faqat g‘alaba uchun kurashamiz.

Lutfulla To‘rayevga kelsak, jarohati tufayli bugungi o‘yinda uning yo‘qligi bilindi. Lekin, birinchi davra yakuniga qadar tiklanib, safimizga qaytadi degan umiddaman.

Chempionat endi boshlandi. Ketma-ket mag‘lubiyatlar futbolchilarimizga ruhiy jihatdan o‘z ta’sirini ko‘rsatdi, lekin, yana bir bor takrorlayman, bugungi g‘alabadan so‘ng har bir jamoaga qarshi jiddiy qarshilik ko‘rsatib, g‘alabalarga erishamiz, —deydi bosh murabbiy.