Ўзбекистон Кубоги доирасида "Динамо" жамоасига қарши сафарда бўлиб ўтган ўйиндан кейин "Нефтчи" жамоаси бош мураббийи Илҳом Мўминжонов қўлга киритилган ғалабадан хурсанд эканлигини яширмади.
—Чемпионатда кетма-кет уч маротаба мағлубиятга учраганимиздан кейин бугунги ўйинда ғалаба қозонишимиз шарт эди ва йигитлар буни яхши тушуниб етган эдилар. Бундан буёғига кубок ўйинларида ҳам чиройли натижаларга эришиб, кейинги босқичга чиқишга ҳаракат қиламиз. Бугунги баҳсда футболчиларимиз олдига қўйилган вазифаларни тўлиқ аъдо этиб, бор вужуди билан ўйин кўрсатганларига алоҳида миннатдорчилик билдираман. Энди навбатдаги "Қизилқум" билан бўлиб ўтадиган турга жиддий тайёргарлик кўрамиз.
Раҳбарият томонидан олдимизга чемпионатда ҳам кубок баҳсларида ҳам юқори вазифалар қўйилган. Бугунги ғалаба йигитларимизга руҳий томондан ижобий таъсир ўтказган ва кейинги турда фақат ғалаба учун курашамиз.
Лутфулла Тўраевга келсак, жароҳати туфайли бугунги ўйинда унинг йўқлиги билинди. Лекин, биринчи давра якунига қадар тикланиб, сафимизга қайтади деган умиддаман.
Чемпионат энди бошланди. Кетма-кет мағлубиятлар футболчиларимизга руҳий жиҳатдан ўз таъсирини кўрсатди, лекин, яна бир бор такрорлайман, бугунги ғалабадан сўнг ҳар бир жамоага қарши жиддий қаршилик кўрсатиб, ғалабаларга эришамиз, —дейди бош мураббий.
