Ko‘plab nashrlar "Ayaks" murabbiyi Erik ten Xag kelasi mavsumdan boshlab "Manchester Yunayted"ni boshqarishi haqida yozishmoqda.

Aslida 52 yoshli niderland haqida gap so‘zlar Manchesterda anchadan beri mavjud. Hatto klubda Ole Gunnar Sulsherning so‘nggi kunlari o‘tar ekan, ten Xag rahbariyatga "MYU" kelajagi bo‘yicha o‘z qarashlarini taqdim etgani haqida ham xabarlar chiqqandi. Uning o‘yin uslubi haqida bilishimiz kerak bo‘lgan jihatlar bugungi "Ayaks"da mujassam — qisqa uzatmalarga qurilgan harakatchan, tezkor va kombinasion o‘yin. Natijalarni esa Gugldan o‘zingiz ham topa odasiz.

Ten Xag 2013-2015 yillarda "Bavariya"da tajriba to‘plagan. Ikkinchi jamoani boshqarar ekan u o‘sha vaqtda asosiy jamoa murabbiyi bo‘lgan Xosep Gvardiolani yaqindan kuzatar, ispaniyalikning mashg‘ulotlarini o‘tkazib yubormaslikka intilardi. Ba’zan Pep bilan uzun bahsga kirishardi Erik.

Ta’sirlanish o‘z yo‘liga. Bunday jarayon istalgan dahoning hayotida yuz berishi mumkin. Masalan, o‘sha Pep Gvardiolaning o‘zi ham qachonlardir aynan gollandiyalik Kroyfdan ta’sirlangan. Bunda alohida shaxs bo‘lib ajralib chiqishning muhim nuqtasi bo‘lib, hamma ham bu nuqtani topolmaydi, albatta. Mutaxassislarning fikricha, Erik Ten Xag uslubida faqat o‘ziga xos bo‘lgan chizgilar bor. Uning sevimli ko‘rinishi 4-2-3-1 hisoblanadi.

"Manchester Yunayted" bugun keskin va ko‘rinishidan klub qadriyatdariga ters bo‘lgan o‘zgarishlarga ehtiyoj sezmoqda. Jamoa DNKni o‘zgartirishga zarurat bordek, go‘yo. Erik ten Xag buni uddalay oladimi yoki yo‘q, buni birga kuzatamiz. Agar xabarlar chinga aylansa, albatta.

Orif Tolipov.