«Barselona» himoyachisi Jerar Pike jarohati sabab «Levante»ga qarshi La Liga doirasida bo‘lib o‘tadigan o‘yinini o‘tkazib yuboradi.
35 yoshli ispaniyalik futbolchi Yevropa ligasi chorak finali doirasida Germaniyaning «Ayntraxt» klubiga qarshi safarda (1:1) bo‘lib o‘tgan o‘yinda jarohat olib, uchrashuvning 23-daqiqasida maydonni tark etishga majbur bo‘lgandi.
Ma’lum bo‘lishicha, Pike son jarohati tufayli 10 aprel kuni bo‘lib o‘tadigan «Levante»ga qarshi La Liga o‘yinidan oldin tiklanishga ulgurmaydi. Shu bilan birga, tajribali markaziy himoyachi «Ayntraxt»ga qarshi bo‘lib o‘tadigan javob o‘yinida tiklanishi mumkin. Futbolchining safga qaytish vaqti hali ma’lum qilinmagan.
Jerar Pike joriy mavsumda «Barselona» safida barcha turnirlarda 38 ta o‘yinda maydonga tushib, 3 bor raqiblar darvozasini ishg‘ol qilgan.
