«Roma» bosh murabbiyi Joze Mourinyo Konferensiyalar ligasi chorak finalining javob o‘yini doirasidagi «Budyo-Glimt»ga qarshi bahs oldidan o‘z fikrlari bilan o‘rtoqlashdi.
«Bizga dramatik qaytish kerak emas. Hisobni tenglashtirish uchun gol urishimiz zarur. Bizda o‘yinga boshqacha tayyorgarlik ko‘rishga vaqtimiz ham yo‘q», - dedi Mourinyo.
«Roma» bosh murabbiyi payshanba kuni uning jamoasidan taktik o‘zgarishlar kutmasligimiz kerakligini qo‘shimcha qildi.
«Hech qanday taktik o‘zgarishlar bo‘lmaydi, «Salernitana»ga qarshi o‘yinning birinchi bo‘limi oxirida men futbolchilarga xotirjam bo‘lishlarini aytdim, chunki biz hisobda ortda qolayotgan edik va bizda 45 daqiqa bor edi. Ertangi bahsda esa bizda to‘liq 90 daqiqa bo‘ladi», - dedi Mourinyo.
Ma’lumot o‘rnida, birinchi o‘yin 2:1 hisobida Norvegiya klubi foydasiga hal bo‘lgandi.
