Krishtianu Ronalduning "Manchester Yunayted"dagi kelajagi Erik ten Xagga bog‘liq.

"Ayaks" bosh murabbiyi shu hafta "Manchester Yunayted" bilan 4 yillik shartnoma imzolaydi.

Ten Xag shtabida ular "Ayaks"da birga ishlagan Mitchell van der Gag ham bo‘lishi kutilmoqda. Bundan tashqari, 52 yoshli mutaxassis “Yunayted”ni yaxshi biladigan yordamchini olib kelmoqchi. Avvalroq Robin van Persi bu roldan voz kechgan edi. Hozirda Rene Melensten va Stiv Maklaren varianti ko‘rib chiqilmoqda.

Daily Mail xabariga ko‘ra, "Manchester Yunayted" bilan shartnomasi 2023 yilning yoziga qadar mo‘ljallangan 37 yoshli hujumchi Krishtianu Ronalduning kelajagi bo‘yicha qaror qabul qilishda shaxsan Ten Xag ishtirok etadi.

Kecha portugaliyalik xet-trik qayd etganiga qaramay, klubda uni ketishi kerak, deb hisoblaydiganlar bor, chunki u niderlandiyalik mutaxassis xohlagancha pressing qila olmaydi. Murabbiyning o‘zi hali Krishtianuni jamoada ko‘rishni xohlash yoki xohlamasligini hal qilmagan.

Qayd etilishicha, Ronalduning og‘ir xarakteri “Manchester Yunayted”ning hamma futbolchilariga ham yoqmaydi.