Криштиану Роналдунинг "Манчестер Юнайтед"даги келажаги Эрик тен Хагга боғлиқ.
"Аякс" бош мураббийи шу ҳафта "Манчестер Юнайтед" билан 4 йиллик шартнома имзолайди.
Тен Хаг штабида улар "Аякс"да бирга ишлаган Митчелл ван дер Гаг ҳам бўлиши кутилмоқда. Бундан ташқари, 52 ёшли мутахассис “Юнайтед”ни яхши биладиган ёрдамчини олиб келмоқчи. Аввалроқ Робин ван Перси бу ролдан воз кечган эди. Ҳозирда Рене Меленстен ва Стив Макларен варианти кўриб чиқилмоқда.
Daily Mail хабарига кўра, "Манчестер Юнайтед" билан шартномаси 2023 йилнинг ёзига қадар мўлжалланган 37 ёшли ҳужумчи Криштиану Роналдунинг келажаги бўйича қарор қабул қилишда шахсан Тен Хаг иштирок этади.
Кеча португалиялик хет-трик қайд этганига қарамай, клубда уни кетиши керак, деб ҳисоблайдиганлар бор, чунки у нидерландиялик мутахассис хоҳлаганча прессинг қила олмайди. Мураббийнинг ўзи ҳали Криштиануни жамоада кўришни хоҳлаш ёки хоҳламаслигини ҳал қилмаган.
Қайд этилишича, Роналдунинг оғир характери “Манчестер Юнайтед”нинг ҳамма футболчиларига ҳам ёқмайди.
