Angliya Premyer-ligasi doimo xorijdan kelgan futbolchilarning sevimli maskani bo‘lgan. Ularning ba’zilari porlagan, boshqalari esa hatto insonlar yodidan ham chiqib ketgan. Masalan, Tyerri Anri, Eden Azar yoki Serxio Aguero kabi futbolchilar o‘zining afsonaviy faoliyatlari sabab muxlislarning abadiy yodida qolgan. Biroq barcha legionerlar ham ingliz futbolida yorqin davrlarni o‘tkaza olmaydi. Quyida siz bilan tarixdagi ana shunday o‘yinchilarning bir nechtasi haqida gaplashamiz.
Jerom Boateng – «Manchester Siti»
Boateng 2010 yilda 10,5 million funt evaziga «Gamburg»dan «Manchester Siti» safiga yo‘l oladi. O‘sha davrda himoyachidan katta narsalar kutilgandi. Voqealar esa Boateng o‘ylaganchalik kechmadi. U Germaniya terma jamoasi bilan tizzasidan jarohat olib, klub miqyosidagi bahslardan tushib qola boshladi. 1 oylik davolanishdan keyin safga qaytgan nemis futbolchisi «Chelsi»ga qarshi bahsda maydonga tushadi. Ammo murabbiy uni asosan qanot himoyachisi sifatida o‘ynatdi. Bir yil davomida atigi 24 ta bahsda ishtirok etgan futbolchi, keyingi mavsumda «Bavariya» safiga yo‘l oldi. Shunday bo‘lsada, Boateng o‘z ona yurtiga quruq qo‘l bilan qaytmadi. U «shaharliklar» safida Angliya kubogi sohibiga aylangan edi. Ayni damda Boateng deganda biz faqat «Bavariya»ni eslaymiz. Chunki u 10 yil mobaynida ayni shu klub sharafini himoya qildi. 2021 yil yozida himoyachi 2 yillik bitim bilan «Lion» safiga kelib qo‘shilgan edi.
Aleshandre Pato – «Chelsi»
O‘z vaqtida Ronaldoning merosxo‘ri, davomchisi deya e’tirof etilgan futbolchi amalda hech qachon braziliyalik vatandoshining darajasiga chiqa olmadi. «Milan» safidagi yorqin faoliyatidan keyin, (150 ta o‘yinda 63 ta gol) Pato 2016 yilda APLga omadsiz bo‘lgan ko‘chishni amalga oshiradi. Yanvar oyida «tumanli Albion»ga o‘tgan Pato, o‘z debyutini aprelgacha kutishiga to‘g‘ri keldi. Ammo u yarim mavsum davomida atigi 2 ta o‘yinda maydonga tushib, yozda «Korintians»ga yo‘l olgan edi. Keyinchalik hujumchi «Vilyarreal», «Tyanszin» safida, ayni damda esa MLSning «Orlando Siti» tarkibida harakat qilmoqda.
Rikardu Kuarejma – «Chelsi»
Portugaliyalik futbolchi Pato kabi ijara asosida Londonga keladi. 2009 yilda, atigi yarim mavsum davomida vinger 5 ta o‘yinda qatnashgan, xolos. Yangi mavsumda esa Kuarejma «Milan»ga qaytadi va APLdagi davri tezda barchaning esidan chiqadi. Keyingi davrlar mobaynida Portugaliya terma jamoasi a’zosi «Inter» va «Beshiktosh»da (227 o‘yin, 38 ta gol va 78 ta assist) harakat qildi. Ayni damda esa 38 yoshli futbolchi o‘z vatanida – «Vitoriya» klubida.
Jerar Pike – «Manchester Yunayted»
Premyer-liga ko‘plab top-himoyachilar uchun makon bo‘lgan. Ammo ular ichida omadsizlari ham bor. Shulardan biri Jerar Pike edi. U «MYU» bilan shartnoma tuzadi va ilk o‘yinini liga kubogi doirasida «Aleksandra» jamoasiga qarshi o‘tkazadi. Ko‘p o‘tmay, himoyachi «Real Saragosa»ga ijaraga berib yuborildi. Ammo bu narsa Pikeni asosiy jamoada barqaror qilmadi. U 4 yillik umrini Manchester shahrida o‘tkazdi. Ammo bor-yo‘g‘i 2 ta o‘yinda maydonga tushirildi. Fergyuson Ispaniya terma jamoasi a’zosini sotib yubordi. Pike esa o‘z jonajon klubiga qaytib, afsonaga aylandi.
Luis Alberto – «Liverpul»
«Lasio» muxlislari Albertoning yaqin mavsumlarda ko‘rsatgan o‘yinidan juda xursand. Ammo bundan 10 yilcha oldin u mersisaydda edi. Hozir bu davrni hech kim eslamaydi. «Liverpul» 2013 yilda yosh futbolchi uchun 7 million funt sarf qiladi. Ammo Albertoga Brenden Rojers hech qachon yetarli imkon bermagan. Filippe Koutinyo bilan bellashishiga to‘g‘ri kelgan yarim himoyachi, Angliyadagi qisqa davri ichida atigi 135 daqiqa maydonda harakat qilgan. U o‘z umrini zoye ketganini sezdi. Shu sabab «Deportivo» safiga ijara asosida yo‘l oldi. U 2016 yilda «Lasio»ga o‘tdi va shundan buyon top-futbolchiga aylandi. Alberto hozirga qadar A seriyada 45 ta golga assist berishga muvaffaq bo‘lgan. 29 yoshli futbolchida hali ham APLga qaytish imkoni mavjud. Ammo uning Angliyadagi manzili «Lester Siti» bo‘lmasligi aniq.
Jaloliddin ISMATOV tarjimasi
