«Frayburg» va Germaniya terma jamoasi himoyachisi Niko Shlotterbek faoliyatini Dortmundning «Borussiya» jamoasida davom ettirish niyatida, deb xabar beradi Sky Sports Germany.

«Frayburg» bilan Bundesligada 5-o‘rinni egallab, Chempionlar ligasi uchun kurashayotgan 22 yoshli markaziy himoyachi jamoasi safida ajoyib mavsum o‘tkazmoqda. Futbolchi chempionatda 28 ta o‘yinda 4 ta gol urgan.

Manbaga ko‘ra, o‘tgan hafta Shlotterbek o‘zining transferiga og‘zaki rozilik bergan. Agar transfer amalga oshsa, Niko «asalarilar» bilan yiliga 4,5 million yevro maosh oladigan besh yillik shartnoma imzolaydi.

Klublar transfer summasi bo‘yicha hozircha bir to‘xtamga kelishmagan. Mish-mishlarga ko‘ra, «Borussiya» 20 million yevrodan ko‘proq pul to‘lamoqchi emas, biroq tomonlar tez orada kelishuvni yakunlashi kutilmoqda.