«Фрайбург» ва Германия терма жамоаси ҳимоячиси Нико Шлоттербек фаолиятини Дортмунднинг «Боруссия» жамоасида давом эттириш ниятида, деб хабар беради Sky Sports Germany.

«Фрайбург» билан Бундеслигада 5-ўринни эгаллаб, Чемпионлар лигаси учун курашаётган 22 ёшли марказий ҳимоячи жамоаси сафида ажойиб мавсум ўтказмоқда. Футболчи чемпионатда 28 та ўйинда 4 та гол урган.

Манбага кўра, ўтган ҳафта Шлоттербек ўзининг трансферига оғзаки розилик берган. Агар трансфер амалга ошса, Нико «асаларилар» билан йилига 4,5 миллион евро маош оладиган беш йиллик шартнома имзолайди.

Клублар трансфер суммаси бўйича ҳозирча бир тўхтамга келишмаган. Миш-мишларга кўра, «Боруссия» 20 миллион евродан кўпроқ пул тўламоқчи эмас, бироқ томонлар тез орада келишувни якунлаши кутилмоқда.