“Пари Сен-Жермен” клуби “Барселона” ҳужумчиси Ферран Торресга қизиқиш билдирмоқда. Шу ёзда парижликлар Брэдли Баркола билан хайрлашишлари мумкин, чунки миш-мишларга кўра, у жамоадаги ўз ролидан норози ва клубдан кетиш ҳақида ўйламоқда.

Таниқли инсайдер Жанлука ди Марционинг хабар беришича, агар франциялик футболчи жамоани тарк этса, “ПСЖ” каталонияликлар билан шартномаси бир йилдан кейин якунига етадиган Торресни сотиб олишга ҳаракат қилиши мумкин.

Transfermarkt портали томонидан 50 миллион еврога баҳоланаётган 26 ёшли испаниялик футболчи ҳам ҳужум марказида, ҳам қанотларда ўйнаш хусусиятига эга. Якунланган мавсумда у “Барселона” сафида барча турнирларда 49 та учрашувда майдонга тушиб, 21 та гол ва 3 та голли узатмага муаллифлик қилди.