"Andijon" Pro liganing 6-tur doirasida safarda “Turon” jamoasiga qarshi o‘yin uchun tayyorgarlikni bugundan boshladi.

Jamoaning mashg‘ulotiga “Andijon” klubi rahbari Jur’atbek Quvvatov ham tashrif buyurdi. O‘z navbatida jamoa rahbari shu kunga qadar “Andijon” klubidagi mavjud moliyaviy muammolar asta-sekin o‘z yechimini topayotgani, turli gap-so‘zlarga e’tibor bermasdan bor e’tiborlarini bo‘lajak o‘yinga qaratishlari zarurligini alohida ta’kidlab o‘tdi.

Bundan tashqari, jamoa a’zolariga bir oylik ish haqqi va mukofot pullari berildi.

Shuningdek, “So‘g‘diyona” jamoasiga qarshi o‘yinda o‘zini har tomonlama ko‘rsatib, muxlislar olqishiga sazovor bo‘lgan Muhammadkarim Toirovga klub rahbari so‘nggi rusumdagi mobil telefonini va’da qilgandi. Gap isboti bilan deganlaridek, bugungi mashg‘ulotdan oldin Muhammadkarim Toirov “Iphone 13 Pro Max” telefonini qabul qilib oldi.

Bir so‘z bilan aytganda, “Andijon” jamoasi yuqori kayfiyat bilan “Turon”ga qarshi bo‘ladigan o‘yin uchun tayyorgarlikni boshladi.