Qirg‘izistonlik iqtidor Turkiyaning asosiy klublaridan biri «Galatasaroy»da deb­yutini nishonladi - qo‘shni mamlakat futboli uchun tarixiy voqea.

Gap 16 yoshli o‘smir yigit Beknaz Almazbekov haqida ketmoqda. Albatta, Turkiyaning 22 karra chempioni sanalgan Istanbul jamoasi asosiy tarkibida maydonga tushish Beknaz uchun alohida qadam. Sport.akipress sayti xulosasi ham shunday.

Beknaz Almazbekov - hujumchi. Uning «Galatasaroy»dagi debyuti Kiyev «Dinamo»siga qarshi kechgan xayriya uchrashuviga to‘g‘ri keldi. Istanbul shahridagi shovqinli «Turk Telekom» stadionida tashkillashtirilgan bu o‘yin Ukraina jamoasining 3:1 hisobidagi g‘alabasi bilan yakunlandi. Almazbekovga kelsak, Qirg‘iziston futbolining ertangi umidi uchrashuvning 82-daqiqasida Turkiya milliy jamoasi hujumchisi Emre Kilinch o‘rnini egalladi. Alohida aytish kerak, uchrashuv «Tinchlik uchun o‘yin» xayriya turnesi doirasida o‘tkazildi. Undan tushgan mablag‘ to‘liq Rossiya - Ukraina mojarosidan jabrlanganlarni qo‘llab-quvvatlashga yo‘naltiriladi.

Beknaz Almazbekov Bishkekning «Alga» klubi va aynan «Galatasaroy» akademiyasida tahsil olgan. U 2017 yildan buyon turk klubi tizimida shug‘ullanmoqda. Joriy yilning mart oyi boshida qirg‘iz yigiti «Galatasaroy» U-19 jamoasiga qabul qilindi. Beknaz endilikda vaqti-vaqti bilan asosiy jamoa mashg‘ulotlarida ham qatnashmoqda. Darvoqe, Almazbekov 2020 yili Osiyoning eng yaxshi yosh futbolchilari ro‘yxatiga kiritildi. Yana bir diqqatni tortadigan holat: u «Galatasaroy» yoshlar jamoa­si o‘yinlaridan birida penalti tepishdan bosh tortdi. Shunchaki, Beknaz hakam raqib darvozasiga jarima zarbasi belgilashda adashgani uchun nuqta oldiga borishni istamadi.

Beknaz Almazbekov mart oyida Qirg‘iziston termasida debyut qilishi mumkin edi (xususan, O‘zbekiston milliy jamoasiga qarshi kechgan o‘yinda). Har holda, jamoa bosh murabbiyi - rossiyalik Aleksandr Krestinin yigitchani Namanganda o‘tkazilgan «Nav­ro‘z kubogi-2022» turniriga jalb etdi. Biroq «Galatasaroy» rahbariyati yosh futbolchini qo‘yib yubormadi.