Superliganing 6-turidan o‘rin olgan bahsda «Navbahor»  Olmaliqda “Qizilqum” mehmoni bo‘ldi.

Mazkur uchrashuv ushbu turning markaziy bellashuvi edi. Boisi, navoiyliklar joriy mavsum o‘yinlarini yaxshi o‘tkazib, milliy chempionatimiz bahslarida hali mag‘lubiyatga uchrashmagan va Coca Cola Superligasi turnir jadvalida peshqadamlik qilishayotgandi.

“Navbahor” esa bu yil o‘z oldiga yuksak  maqsadlar qo‘ygan hamda “Qizilqum” ustidan aynan Olmaliqda, O‘zbekiston Coca Cola kubogi guruh bosqichidan o‘rin olgan o‘yinda 2:0 hisobida g‘alaba qozonib, Nikola Lazarevich shogirdlariga joriy mavsumdagi ilk mag‘lubiyatni taqdim etgandi. Shu bois, mazkur uchrashuvning keskin kurashlar ostida kechishi kutilgandi va amalda ham shunday bo‘ldi.  

Ilk daqiqalardanoq murosasiz tarzda boshlangan uchrashuvning 1-bo‘limida ustunlik ko‘proq jamoamiz tarafida bo‘ldi. “Lochinlar”ning navbatdagi hujumlaridan birida jamoa sardori Azimjon Ahmedovning darvozadan 20 metrlar chamasi uzoqlikdan yo‘llagan zarbasidan so‘ng, to‘pni “Qizilqum” darvozaboni Ignatiy Nesterov qaytardi.

Samvel Babayan shogirdlarining navbatdagi hujumlaridan birida esa  nominal mezbon hisoblangan navoiyliklar o‘z jarima maydonchalari ichida Jamshid Boltaboyevga nisbatan o‘yin qoidasini buzishdi. Aniqrog‘i Timur Nabiyev o‘ng qanotdan jarima maydonchasi ichiga yorib kirgan Jamshidning futbolkasidan tortib, to‘xtatib qoldi. Natijada uchrashuv bosh hakami Ilgiz Tantashev Nabiyevni ikkinchi marta ogohlantirib, uni maydondan chetlatdi va “Qizilqum” darvozasiga 11 metrli jarima zarbasi belgiladi. Penaltini esa jamoamiz sardori Azimjon Ahmedov aniq amalga oshirib, hisobni ochdi – 0:1.

Urilgan goldan so‘ng, ustunlik to‘lig‘icha «Navbahor» tarafiga o‘tdi hamda “lochinlar” hujumni ancha kuchaytirdi. Biroq hujumlar yakuniga yetmadi va jamoamiz tanaffusga 1:0 hisobidagi g‘alaba bilan chiqib ketdi.

Uchrashuvning 2-bo‘limi ham ancha qiziqarli tarzda kechdi. Navoiyliklar maydonda bir kishi kam bo‘lishsada, muvozanatni tiklash, Samvel Babayan shogirdlari esa hisobdagi farqni oshirishga intilishdi. “Qizilqum”ning navbatdagi hujumlaridan birida nigeriyaliya hujumchi Seun Paul Komolafe hisobni tenglashtiriga muvaffaq bo‘ldi – 1:1.

Shundan so‘ng, hujumkorlikni oshirgan namanganliklar hakam tomonidan qo‘shib berilgan vaqtda g‘alaba to‘pini kiritishga muvaffaq bo‘lishdi. Rustamjon Ashurmatov boshi bilan Ignatiy Nesterov qo‘riqlayotgan darvozani aniq nishonga olib, “Qizilqum”ning bu yilgi Superligadagi ilk mag‘lubiyatni tan olishga majbur qildi.

Shu tariqa, «Navbahor» safarda turnir peshqadamini mag‘lubiyatga uchratishga muvaffaq bo‘ldi.

O‘zbekiston Coca-Cola Superligasi. 6-tur
“Qizilqum” – “Navbahor” – 1:2 (0:1)
Gollar: Seun Paul Komolafe (75) – Azimjon Ahmedov (33-pen.), Rustamjon Ashurmatov (90+2).
“Qizilqum”: 1.Ignatiy Nesterov (S), 5.Timur Nabiyev, 6.Erkin Baydullayev,  7.Sanjar Shoahmedov, 10.Temurxo‘ja Abduxoliqov, 11.Aleksandr Stanislavlevich, 20.Islom To‘xtaxo‘jayev, 23.SHerali Jo‘rayev, 28.SHuhrat Muhammadiyev, 33.Oleg Zoteev, 88.Artyom Dmitriyev.
Zaxiradagilar: 35.Javohir Ilyosov, 9.Humoyun Abduazimov,14.Fayzulla Qambarov, 17.Salim Mustafoyev, 18.Jasur Azimov, 25.Azizbek Usmonov, 29.Gabriel Gonzalo, 43.Seun Paul Komolafe, 77.Azamatxon Maksumov.   
“Navbahor”: 1.O‘tkir Yusupov, 4.Boyan Siger, 6.Rustamjon Ashurmatov,7.Azimjon Ahmedov (S), 10.Jamshid Iskanderov, 11.Islom Kenjaboyev, 14.Jamshid Boltaboyev, 23.Yovan Jokich, 24.Davronbek Hoshimov, 28.Stanislav Andreev, 32.Zoran Marushich.
Zaxiradagilar: 35.Rahimjon Davronov, 9.Ibrohim G‘anixonov, 17.Ehsoni Panshanbe, 19.Nurillo To‘xtasinov, 22.Igor Golban, 30.Elguja Grigalashvili, 70.Muhammadbobir Mo‘ydinov, 77.Asadbek Sobirjonov, 99.Andrey Sidorov.
Hakamlar: Ilgiz Tantashev, Andrey Sapenko, Timur Gaynullin, Rustam Choriyev.
VAR hakami: Rahimbek Karimov.
VAR assistenti: Aleksandr Sidorov.
Nazoratchi: Dmitriy Roman.
Komissar: Muhammad Sodiq Oxunov.