Jahon futboli afsonasi Pele “Real” hujumchisi Rodrigoni Chempionlar ligasi yarim finalidagi “Manchester Siti”ga qarshi javob uchrashuvidan so‘ng (3:1) tabrikladi.
“Do‘stim, seni tabriklaydigan kun kelishini doim bilardim. Qattiq mehnat qiladigan va o‘z ishini sevadiganlar uchun boshqa iloj yo‘q. Senda katta iste’dod bor va bizga ko‘proq quvonch keltirishda davom etasan, Rodrige.
Tabriklaymiz, "Real!". Finalni kuta olmayman”, - deb yozdi Pele ijtimoiy tarmoqda.
Rodrigo Pelening tabriklariga javob qaytardi.
“Bu so‘zlaringiz uchun rahmat, qirol! Men sizning maslahatlaringizni hech qachon unutmayman va doimo minnatdor bo‘laman", - deb yozadi Rodrigo.
Ikkinchi bo‘lim o‘rtalarida zaxiradan maydonga tushgan 21 yoshli hujumchi “Manchester Siti” darvozasini ikki bor ishg‘ol qildi. Rodrigoning gollari "Real Madrid"ga uchrashuvni qo‘shimcha bo‘limga o‘tkazish imkonini berdi.
Madridning “Real” klubi “Manchester Siti”ni umumiy hisobda 6:5 hisobida mag‘lub etdi. Chempionlar ligasi finalida “qaymoqranglilar” “Liverpul”ga qarshi bahs olib boradi.
