Жаҳон футболи афсонаси Пеле “Реал” ҳужумчиси Родригони Чемпионлар лигаси ярим финалидаги “Манчестер Сити”га қарши жавоб учрашувидан сўнг (3:1) табриклади.

“Дўстим, сени табриклайдиган кун келишини доим билардим. Қаттиқ меҳнат қиладиган ва ўз ишини севадиганлар учун бошқа илож йўқ. Сенда катта истеъдод бор ва бизга кўпроқ қувонч келтиришда давом этасан, Родриге.

Табриклаймиз, "Реал!". Финални кута олмайман”, - деб ёзди Пеле ижтимоий тармоқда.

Родриго Пеленинг табрикларига жавоб қайтарди.

“Бу сўзларингиз учун раҳмат, қирол! Мен сизнинг маслаҳатларингизни ҳеч қачон унутмайман ва доимо миннатдор бўламан", - деб ёзади Родриго.

Иккинчи бўлим ўрталарида захирадан майдонга тушган 21 ёшли ҳужумчи “Манчестер Сити” дарвозасини икки бор ишғол қилди. Родригонинг голлари "Реал Мадрид"га учрашувни қўшимча бўлимга ўтказиш имконини берди.

Мадриднинг “Реал” клуби “Манчестер Сити”ни умумий ҳисобда 6:5 ҳисобида мағлуб этди. Чемпионлар лигаси финалида “қаймоқранглилар” “Ливерпуль”га қарши баҳс олиб боради.